នាង Coco Lee ជាតារាចម្រៀង និងជាអ្នកនិពន្ធបទចម្រៀងសញ្ជាតិអាមេរិកដើមកំណើតហុងកុង ដែលមានអាជីពជោគជ័យខ្ពស់នៅអាស៊ី បានទទួលមរណៈភាពនៅអាយុ 48 ឆ្នាំដោយការធ្វើអត្តឃាត ដោយសារជំងឺបាក់ទឹកចិត្ត (Depression) នេះបើតាមបងប្អូនបង្កើតរបស់នាងបាននិយាយនៅថ្ងៃពុធ ទី០៥ ខែកក្កដា ឆ្នាំ២០២៣នេះ។
តារាស្រីរូបនេះបានទទួលរងនូវជំងឺធ្លាក់ទឹកចិត្តយ៉ាងធ្ងន់ធ្ងរអស់រយៈពេលជាច្រើនឆ្នាំ បងស្រីរបស់ Lee Carol និង Nancy Lee បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើ Facebook និង Instagram ជាមួយនឹងស្ថានភាពរបស់នាងកាន់តែយ៉ាប់យ៉ឺនក្នុងរយៈពេលប៉ុន្មានខែចុងក្រោយនេះ។
សេចក្តីថ្លែងការណ៍បានអានថា “ទោះបីជា CoCo បានស្វែងរកជំនួយដែលមានជំនាញវិជ្ជាជីវៈ និងបានប្រឹងប្រែងអស់ពីសមត្ថភាពដើម្បីប្រយុទ្ធប្រឆាំងនឹងជំងឺធ្លាក់ទឹកចិត្តក៏ដោយ គួរឱ្យសោកស្ដាយដែលបិសាចនៅក្នុងខ្លួនបានឆក់យកជីវិតរបស់នាងបាត់ទៅហើយ”។
បងស្រីរបស់នាងបាននិយាយថា Coco Lee បានប៉ុនប៉ងធ្វើអត្តឃាតនៅផ្ទះកាលពីចុងសប្តាហ៍ ហើយនាងត្រូវបានបញ្ជូនទៅមន្ទីរពេទ្យភ្លាមៗ។ ពួកគេបាននិយាយថានាងសន្លប់ហើយបានស្លាប់នៅថ្ងៃពុធ។
ដំណឹងនៃការធ្វើអត្តឃាតរបស់តារាចម្រៀងដ៏ល្បីរូបនេះ បានធ្វើឱ្យអ្នកគាំទ្ររបស់នាងភ្ញាក់ផ្អើល និងបង្ហាញការសោកស្ដាយយ៉ាងខ្លាំង។ បណ្ដាញសង្គមធំៗជុំវិញពិភពលោកក៏បានចុះផ្សាយពីការធ្វើអត្តឃាតរបស់តារាចម្រៀង និងជាអ្នកនិពន្ធដ៏ល្បីម្នាក់នេះព្រោងព្រាត។
គួរជម្រាបថា CoCo Lee កើតនៅហុងកុង ប៉ុន្តែក្រោយមកបានផ្លាស់ទៅរស់នៅសហរដ្ឋអាមេរិក ជាអ្នកចម្រៀង Pop ក្នុងទសវត្សរ៍ឆ្នាំ 1990 និងឆ្នាំ 2000 ដែលនាងត្រូវបានគេស្គាល់ដោយសារសំឡេងដ៏មានឥទ្ធិពល និងការសម្តែងផ្ទាល់របស់នាង ហើយត្រូវបានគេដឹងថា បានធ្វើការដោយមិននឿយហត់ដើម្បីបើកពិភពលោកថ្មីសម្រាប់អ្នកចម្រៀងចិនក្នុងឆាកតន្ត្រីអន្តរជាតិផងដែរ៕
